Kamogelo Muvhenzhe
Ngesikhathi ethola isikhalazo ngephathi ‘ye-after tears’ eyenziwa nabantu abangaphezu kwabangama-200, Amaphoyisa kaMasipala wase-Joburg awachithanga sikhathi.
Ngokushesha baye endaweni ese-Protea, e-Soweto, beyohlakaza isixuku.
Kepha lawa maphoyisa amane athola okungaphezulu kwalokho abakulindele.
Ngokusho kokhulumela i-JMPD uWayne Minaar la maphoyisa ahlaselwe ngesikhathi ezama ukuthatha utshwala emcimbini.
“Amaphoyisa ethu ahlaselwa yisixuku futhi kwadingeka ukuthi athole ukwelashwa esibhedlela. Elilodwa laphuka ikhala nesandla sobunxele,” kusho uMinaar, wengeza ngokuthi amaphoyisa asephumile esibhedlela.
Kuboshwe abasolwa ababili bathweswa icala lokushaya ngesikhathi kuthathwa i-Golf.
UMinaar uxwayise umphakathi ngokuba namaphathi anoma iluphi uhlobo kanye nokuphuza utshwala esidlangalaleni ngesikhathi sezinga lesithathu lomvalelo kungenjalo bazoboshwa.