Lubhalwe nguNkhensani Mthombeni
Amaphoyisa ase-Vhembe, e-Limpopo abambe izimpahla zomgunyathi ezingaphezu kuka-R4 million emkhankasweni omkhulu wokuhlanza idolobha ngaphambi kwempelasonto yephasika kanti konke lokhu kwenzeke enkabeni yedolobha lase-Musina.
Abagcinanga nje ngokuthola inqwaba yezingubo nezicathulo eziwumgunyathi ezivela ezinkampanini ezinkulu zamazwe ngamazwe, okuhlanganisa i-Nike, i-Adidas, i-Mercedes Benz, i-BMW, i-Air Jordan, ne-Fabiano, kodwa baphinde bathola inqwaba yemifaniswano ye-G4S Security engagunyaziwe endaweni yokugcina izimpahla!
“Sikwazile nokukhipha izinto zokugcoba ubuso zenani lika-R30 000 emigwaqeni,” kusho okhulumela amaphoyisa akwa-SAPS esifundazweni, uColonel Malesela Ledwaba.
Lo msebenzi owenziwe amaphoyisa ubungelona ihlaya, ububandakanya izikhulu zeMnyango kahulumeni eyahlukene, okubalwa i-SAPS, i-SANDF, izikhulu zomgwaqo, i-SARS Customs, nezinye izinhlaka zomthetho. Lawa maphoyisa azimisele ngokukhuculula imigwaqo nokulwisana nazo zonke izinto ezingalungile.
Amaphoyisa abophe abasolwa abangu-20 abaphakathi kweminyaka engu-20 no-50 ngamacala ahlukene okuhlanganisa ukuphuza esidlangalaleni, ukwephula umthetho we-Immigration Act, nokungalandeli imithetho ye-Liquor Act. Amabhasi amancane amabili abengafanele ukuba semgwaqeni nawo aboshiwe, kwathi izitolo ezine zaphucwa amalayisensi azo okuhweba.
Abasolwa ababoshiwe bazovela eNkantolo yeMantshi yaseMusina maduze nje. Asethembe ukuthi ubulungiswa buzokwenzeka!
Esithombeni esingenhla: Amaphoyisa ashaqe izimpahla zomgunyathi ezingabiza u-R4 million e-Limpopo
Umthombo wesithombe: I-Limpopo SAPS