Dylan Bettencourt
Iziphathimandla zase-France zivumile ukuthi zenze amaphutha ngodlame oluqubuke ngaphambi komdlalo wamanqamu we-Uefa Champions League obuphakathi kwe-Liverpool ne-Real Madrid.
Umqondisi we-French Football Federation u-Erwan Le Prevost uveze ukuthi ividiyo ye-CCTV yengxabano phakathi kwabalandeli be-Liverpool namaphoyisa ase-France icekelwe phansi ngemuva kwesonto kudlalwe lo mdlalo.
Ngenkathi amaphoyisa ase-France ekhomba abalandeli be-Liverpool ngeminwe ngokugqugquzela uthuthuva ngenxa yokuthi abalandeli abaningi bebenamathikithi omgunyathi, i-Le Prevost ibingenayo ividiyo noma ubufakazi bezithombe ezifakazela lokhu.
Uthe le vidiyo ishabalale ngemuva kwezinsuku eziyisikhombisa ngaphandle uma iziphathimandla zendawo zenza ngenye indlela.
Amalungu ekomiti le-Senate eliphenya ngalesi sigameko awazange ajabule ngamaphoyisa endawo.
Usihlalo wekomiti uFrançois-Noël Buffet uthe lokhu kumele kuphakamise ukukhathazeka okukhulu emaphoyiseni.
“Uma kuyiqiniso ukuthi izithombe azithathwanga, lokho kungaba yinkinga enkulu,” esho.
Isikhulu samaphoyisa e-Paris, uDidier Lallement, uwuhoxisile umbono wakhe awenze ezinsukwini ezimbalwa ngemuva komdlalo wamanqamu, lapho athe abalandeli be-Liverpool ababalelwa ku-3,000 beze e-Stade de France namathikithi omgunyathi.
“Mhlawumbe ngenze iphutha ngesibalo engisinikeze uNgqongqoshe. Angikaze ngithi lesi sibalo sinembile kodwa isimo besikhomba lokho enkundleni,” esho.
ULallement uvumile ukuthi sonke lesi sigameko asibanga sihle njengoba abantu behlaselwe kanti amaphoyisa anomsebenzi wokubagcina bephephile,” esho.
“Kuyaphoxa kakhulu ngoba isithunzi sezwe sicekeleke phansi.”
Kodwa-ke uLallement akavumanga ukuthi kusetshenziswe isisi esikhalisa unyembezi, wancamela ukuthi kusetshenziswe igesi.
“Ngiyaxolisa kodwa bezingekho ezinye izindlela ebesingenza ngazo,” echaza.
Umphathi wamaphoyisa e-Paris usamile kwelokuthi amathikithi omgunyathi yiwona ayimbangela enkulu yodlame oluqubuke ngomhlaka-28 kuNhlaba.