Everson Luhanga
Komunye umkhankaso wokulwa nabavukuzi abangekho emthethweni ngoLwesithathu amaphoyisa angene emigodini emincane esebenzisa izindiza ukubajaha agasela ezindlini ezise-Krugersdorp.
Esontweni eledlule uNgqongqoshe wamaPhoyisa uBheki Cele kanye noKhomishana wamaPhoyisa esifundazweni sase-Gauteng uLieutenant General Elias Mawela bebehola imisebenzi yamaphoyisa e-West Rand.
Imbangela yalokhu iza ngemuva kokuhlasela kweqembu labesilisa abalinganiselwa ku-20 abebehlomile abahlasele iqembu ebelishutha ividiyo yomculi badlwengula abesifazane abayisishagalombili babaphuca amathuluzi angabiza imali engu-1.5 million.
Ukugasela kwabavukuzi abangekho emthethweni e-West Rand kuqhubekile ngoLwesithathu ngesikhathi ukhomishana wamaphoyisa esifundazweni ehola umkhankaso omkhulu.
Kuboshwe abavukuzi abaningi kwashaqwa amathuluzi abo.
Ngesikhathi elinye iqeqebana liboshwa ngoLwesithathu elinye iqeqebana eliboshwe ngempelasonto livele eNkantolo yeMantshi yase-Krugersdorp.
Bonke abasolwa abangu-60 abebevele eNkantolo babhekene namacala okuba kuleli ngaphandle kwemvume efanele.
Bebemelwe ngosizo lwezomthetho eNkantolo kanti amacala abo ahlehliselwe uLwesithathu ngesonto elizayo.
INkantolo iphinde yathola ukuthi abasolwa abaningi ababoshiwe basebancane. Bayiswe eNkantolo Yezingane lapho amacala abo ezoqulwa khona.
Umbuso uzophinde uhlole iminyaka kubasolwa abangu-15 okukholakala ukuthi basebancane futhi ubheka ukuthi banawo yini amarekhodi obugebengu.
Osopolitiki nabo bagxumele kuleli cala.
Okhulumela i-ANC kuzwelonke uPule Mabe bahlale ngaphandle kwase-Krugersdorp ngoLwesithathu beseka abesifazane abahlukunyezwe ngokocansi.
UMabe uthe sekuyisikhathi sokuthi kukhuzwe izigebengu zinganikwa thuba lokutanasa emgwaqeni. “Okwenzeke e-Krugersdorp ngesonto eledlule kumele kube into esiphaphamisa sonke.
“Sidinga uhulumeni wethu asebenze ngokuzikhandla ukubhekana nalezi zinkinga zabavukuzi abangekho emthethweni, abantu abaqhamuka kwamanye amazwe ngokungemthetho, kanye nezimayini ezindala kodwa ezisavuliwe.” Uphonde wathi “uhulumeni kumele enze isiqiniseko sokuthi izinkampani zezimayini azilokothi zishiye izindawo zingalungiswa.”
Amanye amaqembu ezepolitiki abezwakalisa intukuthelo yawo mayelana namacala anyantisayo.
Iqembu le-Economic Freedom Fighters licele uNgqongqoshe wamaphoyisa ukuthi asule esikhundleni ngenxa yokwehluleka ukubhekana nobugebengu ezweni.
Isishoshovu sobugebengu nomholi we-Action Society u-Ian Cameron ubuze ukuthi umuntu uzolinda isikhathi esingakanani ngaphambi kokuthi kutholakale imiphumela yokuhlolwa kolibofuzo njengoba usamningi umsebenzi okumele wenziwe.