Lubhalwe nguBuziwe Nocuze
- Amaphoyisa alimaze umsolwa obegebenga ehlomile ngesikhathi edubulana nemoto emigwaqeni yaseGugulethu.
- Umphakathi uthi leli qembu lezigelekeqe belilokhu liphilisa kabuhlungu izakhamizi, lihlwitha izikhwama namafoni kubantu emigwaqweni.
Amaphoyisa adubule alimaza owesilisa ovulele ngenhlamvu ebhekise kuwo eGugulethu, eKapa, ngeSonto.
Le nsambatheka iqale ngesikhathi imoto yohlobo lwe-Volkswagen Polo esiliva yenqaba ukumela amaphoyisa e-Maitland Flying Squad e-NY108 nase-NY06.
Okhulumela amaphoyisa e-SAPS eWestern Cape usayitsheni uWesley Twigg uthe abagibeli bemoto ewuhlobo lwe-Polo yibo abaqale ukudubula bebhekise emotweni yamaphoyisa.
“Amaphoyisa aphindisele ngenhlamvu kwalimala umsolwa oyedwa. Umshayeli wemoto ulimale engozini e-NY50, abasolwa ababili baphuma emotweni babaleka bangena phakathi kwezindlu,” kusho uTwigg.
Amaphoyisa athole izikhwama ezintshontshiwe, ama-laptop kanye nezikhwama zemali emotweni. Babophe umlisa oyedwa, ozovela eNkantolo yeMantshi yase-Athlone.
Isakhamuzi sakule ndawo u-Akhona Xonti wethemba ukuthi umsolwa oboshiwe uzosiza kubanjwa nalaba abehamba nabo.
“IGugulethu ayisafani nakuqala, ubugebengu buyadlondlobala, kunzima nokubamba izigebengu ezisigebenga zisebenzisa izimoto ngoba zisiphuca izikhwama namafoni zibaleke, ziphinde zishaye izisulu ezigoloza nezimpahla zazo ezibalulekile,” kusho uXonti.
Uthe muva nje izigebengu zigebenge owesifazane ngaphandle kwesango lakubo ngesikhathi elinde imoto eya emsebenzini.
“Imoto enabesilisa abathathu—ababili abokufika kanye noyedwa wakuleli—bamkhombe ngezibhamu bemtshela ukuthi angamemezi, bamthathele izimpahla zakhe,” kusho uXonti.
Esithombeni esingenhla: Umsolwa udutshulwe ngamaphoyisa e-SAPS ngemuva kokuthi eqale ukudubula ebhekise emalungwini.
Umthombo wesithombe: Sihlinzekwe ngabakwa-SAPS