Lubhalwe nguDoreen Mokgolo
Amaphoyisa ase-North West abophe abasolwa abane abathinteka ekudayisweni kwezincwadi zokushayela ngomgunyathi.
Abesilisa ababili abahlola izincwadi zokushayela kanye nabaphathi bezikole zokushayela baboshwe e-Klerksdorp kanye nase-Stilfontein esifundazweni.
Abanye abasolwa ababili kulindeleke ukuthi baboshwe maduze.
Imikhonyovu yezincwadi zokushayela iyisihlava sikazwelonke. Kwezinye izigameko izikole ezifundisa ukushayela zisebenzisa abashayeli abaqeqeshiwe ukwenza izivivinyo zokushayela egameni lalabo abafake izicelo, ngokusho kokhulumela i-Road Traffic Management Corporation uSimon Zwane.
Uthe ukuboshwa kwabasolwa e-North West kuza ngemuva kophenyo lweminyaka emibili olwenziwa uphiko olulwa nenkohlakalo emgwaqeni kanye nophiko lwe-South African Police Services olulwa nenkohlakalo kanye nobugebengu.
“Uphenyo luveze ukuthi abahloli ezinkundleni zokuhlolwa bebesebenzisana nabaphathi bezikole ezifundisa ukushayela ukuze bakhiphe izincwadi zokushayela ngomgunyathi.
“Lokhu kwenza ukuthi abashayeli abasafufusa bathole izincwadi zabo ngaphandle kokuhlolwa okudingekayo,” esho.
Uphenyo luphinde lwathola ukuthi lesi sikhungo sidune izikhungo zezincwadi zokushayela e-Klerksdorp, e-Potchefstroom nase-Stillfontein ukuze senze imisebenzi yaso yenkohlakalo.
Isikhulu sesikole esifundisa ukushayela esicele ukungadalulwa sitshele i-Scrolla.Africa ukuthi bonke abashayeli abasafufusa abafunda ezikoleni zokushayela bakhokha imali yokugwazela ukuze baphumelele izivivinyweni zabo.
“Le mali ekhokhwa umfundi esikoleni sokushayela okuyiyo ekhokhelwa izikhulu isuka ku-R2 500 iye ku-R5 000,” esho.
Abasolwa bagcinwe esitokisini samaphoyisa esiteshini sase-Jouberton kanti kulindeleke ukuthi bavele eNkantolo yeMantshi yase-Klerksdorp ngoLwesithathu.
Khonamanjalo, ezinye izikhulu eziyishumi ezikhipha izincwadi zokushayela zase-Harrismith e-Free State zizovela enkantolo yendawo ngomhlaka-25 kuNhlaba.
Babhekene namacala okukhwabanisa ahlobene nokukhishwa kwezincwadi zokushayela.
Ezinye izikhulu ezinhlanu zizovela enkantolo yesifunda sase-Bethlehem ngamacala afanayo. Bonke baboshwa ngo-2021.
Esithombeni esingenhla: Incwadi yokushayela
Umthombo wesithombe: UMnyango wezokuThutha