Lubhalwe nguBuziwe Nocuze
Abaseshi babophe abesilisa ababili ngoLwesibili ngokubulala abantu abane endaweni yokugunda izinwele eKhayelitsha.
Isigameko sokudubula senzeke eSite C eKhayelitsha, eKapa, ngoMgqibelo lapho kudutshulwe kwabulawa izingane ezintathu ezineminyaka ephakathi kwemihlanu, engu-11 no-12, kanye nowesilisa oneminyaka engu-30 ubudala.
Okhulumela amaphoyisa e-SAPS eWestern Cape, uBrigadier Novela Potelwa uthe njengengxenye yophenyo oluqhubekayo mayelana namacala okubulala amaningi, abasolwa babhekene namacala amane okubulala nayisishiyagalolunye okuzama ukubulala.
Bazovela eNkantolo yeMantshi yaseKhayelitsha ngoLwesihlanu.
“Njengoba kuqhubeka uphenyo angeke kuqinisekiswe ukuthi angeke kuboshwe abanye abantu,” kusho uPotelwa.
UNgqongqoshe woMnyango wezamaPhoyisa nokuPhepha koMphakathi eWestern Cape, uReagen Allen uthe abasolwa kumele baphumele obala ukuze noma ubani othintekayo abhekane nemiphumela.
“Lolu uhlobo lwamaphoyisa esiludingayo, njengoba kuwubufakazi obusobala ukuthi kuningi okungenziwa amaphouisa e-SAPS abe namandla okuthola aphinde asebenzise kahle olwazi namakhono awo,” kusho u-Allen.
Isakhamuzi esingathandanga ukudalulwa sinethemba futhi sithandazela ukuthi abaseshi babambe abantu okuyibona abenze leli cala.
“Angifuni ukujabula okwamanje ngoba ngizibonile lezi zinto zenzeka,” kusho isakhamuzi.
“Emacaleni amakhulu afana nalawa, amaphoyisa ethu kwesinye isikhathi enza amaphutha ekubambeni abasolwa abangafanele. Bayaboshwa bese sizwa kuthiwa badedelwe ngoba ubufakazi abukho. Ngethemba ukuthi ngeke sizizwe izindaba ezinjalo.”
Isithombe ngenhla: Amaphoyisa.
Umthombo: Ifayela