Amaphoyisa abhekene necala lokubulala uMthokozisi Ntumba

Everson Luhanga

I-Independent Police Investigative Directorate (i-IPID) isiqinisekisile ukuthi kuboshwe amaphoyisa amane asolwa ngecala lokubulawa kukaMthokozisi Ntumba, oneminyaka engama-35, owabulawa ngesikhathi kunombhikisho wabafundi e-Wits University ngeviki eledlule ngoLwesithathu.

Esitatimendeni sabezindaba esikhishwe yi-IPID, okhulumela  uphiko lwe-IPID kuzwelonke uNdileka Cola ukuqinisekisile ukuthi la maphoyisa amane avela ophikweni i-Public Order Policing.

“La maphoyisa azovela eNkantolo yeMantshi yaseGoli ngoLwesithathu. Babhekene namacala okubulala, amathathu okuzama ukubulala kanye neyokuvimba  ukusebenza kwengalo yomthetho,” kufundeka isitatimende.

Abakwa-Scrolla.Africa bakhulume nokhulumela umndeni uSthembiso Jwara, othe umndeni uyakwamukela ukuboshwa kwamaphoyisa.

“Ukubabopha isinyathelo esisodwa nje. Singakujabulela ukubona ukuqulwa kwecala ngokushesha nokubona ukulahlwa yicala kwamadoda abulala umzala wami,” esho.

USthembiso uthe kunzima, njengoba umndeni kufanele ubhekane nezinkinga eziningi zenqubo ngenkathi usakhala.

“Unkosikazi kaMthokozisi akaphathekile kahle nhlobo. Ukhathazekile ngokudlula emhlabeni komyeni wakhe kungazelelwe,” esho.

USthembiso ukuqinisekisile ukuthi uMthokozisi uzofihlwa ngoMgqibelo e-Bergville, okuyidolobha elincane elisezintabeni zoKhahlamba KwaZulu-Natali.

“Siyethemba ukuthi ngoMgqibelo sizobe sesinemiphumela ye-postmortem ukuze sikwazi ukuthatha isidumbu sakhe siye endaweni yokuphumula ekhaya.”

UMthokozisi wadutshulwa wabulawa, nokusolakala ukuthi wabulawa ngamaphoyisa, ngesikhathi kunemibhikisho yabafundi base-Wits enkabeni yeGoli. Abafundi bafuna ukuthi inyuvesi ivumele abafundi abanezikweletu ukuthi bavunyelwe ukubhalisa.

Lo baba wezingane ezine ubephuma emtholampilo wendawo ngesikhathi amaphoyisa abeshayela inyala ephuma emotweni yawo emdubula.

UTebogo Sedibe, ongudokotela ozame ukuvusa uMthokozisi, uthe le ndoda ibinamanxeba amathathu ezinhlamvu nembobo enkulu esifubeni.