Lubhalwe ngu-Everson Luhanga
Amaphoyisa abophe uPethe Sara Simiao, osolwa ngokudlwengula nokubulala u-Amantle Semane oneminyaka eyisithupha e-Orlando, eSoweto.
Ubanjwe eZola 1 kanti ugcinwe esiteshini samaphoyisa e-Orlando ngaphambi kokudlulela esiteshini samaphoyisa eMoroka ukuze avele enkantolo.
NgoLwesibili, amaphoyisa aseGauteng acele umphakathi ukuthi usize ekutholeni indoda esolwa ngokudlwengula yabulala intombazane encane ngoMsombuluko ngomhlaka-21 kuMfumfu.
Okhulumela amaphoyisa uLieutenant-Colonel Mavela Masondo phambilini uthe: “Kubikwa ukuthi intombazane ibidlala nezinye izingane ngesikhathi umsolwa eyibizela emjondolo awuqashile komunye wemizi e-Orlando.
“Umsolwa usolwa ngokudlwengula nokubulala intombazane emjondolo. Udaba lubikiwe emaphoyiseni aphendule ngokushesha aqala athungatha umsolwa obalekile.”
NgoLwesithathu, amaphoyisa kanye nezakhamuzi zase-Orlando East ebezithukuthele zigane unwabu bebethungatha umsolwa ongowokudabuka e-Mozambique emigwaqeni. Babamba futhi bashaya omunye wabangane bakhe, bezama ukumenza aveze lapho ecashe khona uSimiao.
Ngemuva kokulunywa indlebe ngoLwesithathu ebusuku, amaphoyisa amtholile ambopha. Abaseshi abakhulu basaphenya njengoba uSimiao ezilungiselela ukubhekana nenkantolo.
Esithombeni esingenhla: Usolwa ngokubulala nokudlwengula uPethe Sara Simiao ezandleni zamaphoyisa ambopha eZola 1, eSoweto.
Umthombo: Sithunyelwe