Amalungu e-Azapo avale amahhovisi e-Nersa 

Lubhalwe nguKarabo Rammutla

Amalungu enhlangano i-Azanian People’s Organisation (Azapo) afunge agomela ukuthi ngeke aphume emahhovisi alawula ugesi kuze kube kuhlangatshezwana nezimfuno zawo.

Sekuphele izinsuku ezintathu amalungu aleli qembu ehlezi emahhovisi e-National Energy Regulator of South Africa (Nersa) e-Tshwane ezwakalisa ukungenami kwawo ngokwenyuswa kwesabelomali  i-Nersa esinika u-Eskom. I-Azapo ifuna ukwenyuswa kwemali kubuyiselwe emuva ngaphandle kwemibandela.

Bathi ukunyuka kwemali kuzoholela emiphumeleni ebuhlungu kubasebenzisi bakagesi.

IPhini likaMengameli we-Azapo, uKekeletso Khena uthe bamemezele ukuthi bazohlala lapha kuze kube kubuyekezwa ukwenyuswa kwezimali.

“Kuyasicasula ukugunyazwa kuka-18.65% okunikwe u-Eskom ngabaqondisi bakagesi njengoba abantu bakuleli beqhubeka nokubhekana nenkinga yokukhuphuka kwezindleko zokuphila ekubeni izwe licwile ebumnyameni kusukela kuqale unyaka,” etshela i-Scrolla.Africa.

UKhena uthe nakuba behlangene nabammele i-Nersa babonisana ngemvelaphi yokwenyuswa kwemiholo ngo-18.65% ngeke banyakaze.

“I-Nersa iveze ukuthi baphoqwa imiyalelo emibili yenkantolo – wangoZibandlela ngo-2021 nowangoNhlangulana nyakenye – ukuthi bamukele isicelo sakwa-Eskom. I-Azapo ibona ‘isicelo’ sakwa-Eskom njengesifana nesidingo esingenangqondo nesingenabulungiswa,” esho.

UKhena uthe isinqumo se-Nersa besingahambisani nalokhu.

“Lokhu kuza ngesikhathi lapho u-Eskom wehluleka khona ukukhiqiza ugesi nokuyinto ebhidlize umnotho wezwe, kwadala ukuthi izinga lokukhiqiza linciphe, kwehle izinga lokuntuleka kwemisebenzi kanye nokwenyuka kwentengo yokudla. Impela u-Eskom wenze abantu bakuleli bahlupheka futhi wenza isimo somnotho saba sibi kakhulu ezweni kodwa bafuna ukwenyuselwa imiholo.”

Ilungu le-Azapo, uGaontebale Nodoba uthe ukulahlwa icala kwe-Nersa enkantolo kusho ukusebenzisana nabakwa-Eskom.

UNodoba wengeze ngokuthi umkhokhiwentela ngeke ajeziswe “ngokungacabangi kwabaholi abangenasimilo abazishaya indiva izimiso zokuphatha ngokubambisana ngaso sonke isikhathi.”

I-Nersa ibukeka izoba nemibhikisho eminingi njengoba i-South African National Civic Organisation ihlela ukuya emahhovisi omlawuli ngoLwesihlanu.

Esithombeni esingenhla: Amalungu e-Azapo ahlezi emahhovisi e-Nersa e-Tshwane

Umthombo wesithombe: Karabo Rammutla

Izihloko zakamuva