Lungani Zungu
Kubonakale inqwaba yezimoto nabalandeli beya eNkandla ngaphambi kwenkulumo yalowo owayenguMengameli wezwe, uMnu. uJacob Zuma, kubalandeli bakhe ngeSonto ntambama.
Le nkulumo iza njengoba eqhubeka nokulwa nabezomthetho ngenhloso yokugwema ukudonsa isigwebo sakhe sezinyanga eziyi-15 ejele.
NgoLwesihlanu, uZuma wethule isicelo senkantolo ngomzuzu wokugcina sokuthi kuguqulwe isigwebo senkantolo yomthethosisekelo.
Inkantolo ephakeme ezweni ivumile ukulalela izimpikiswano zikaZuma ngoMsombuluko, ngomhla ziyi-12 kuNtulikazi.
Abalandeli bakhe baqhubekile nokuthutheleka eNkandla, lapho okushaywa indiva obala kwemithetho yomvalelo.
Uhide lwezimoto olusuka eShowe, okungamakhilomitha angaba ngama-70 ukusuka eNkandla, luvinjwe ngamaphoyisa emini zibheke emzini kaZuma ngeSonto.
Lokhu kuholele ekutheni kube nenxabano phakathi kwamaphoyisa nabalandeli bakaZuma.
Abalandeli bakhe basabise ngodlame uma kuzoboshwa uZuma ngenxa yokwenqaba ukuvela kwikhomishini ephenya ngokulawulwa kombuso.
I-ANC ebuholini base-KZN, eholwa nguMnu. uSihle Zikalala, iye eNkandla ngenhloso yokuqeda udweshu, kodwa isicelo sabo siwele ezindlebeni ezingezwa.
Kwividiyo evele ngoMgqibelo, uZuma uthe ngeke aye enkantolo lapho ekhuluma khona Nezinduna (amabutho), ngenkathi bemvakashele eNkandla.
UNobhala-Jikelele we-ANC omisiwe u-Ace Magashule, umsekeli oqotho kaZuma, ubephakathi kwabantu abasezingeni eliphezulu abakhombise ukweseka uZuma osenkingeni.
UZuma, owayekade ekhwela edilika kwezobulungiswa futhi ezisola ngokwenzelela, manje uyabuya, wethula isigqoko, ucela ushwele.
Emaphepheni akhe asenkantolo, uZuma uthe akumele enziwe ukuthi adonse isigwebo sakhe njengoba ukuboshwa kwakhe kuzosebenza njengesitatimende sezepolitiki.
Uphinde waveza nokuthi udinga ukwelashwa okuqinile njalo ngenxa yeminyaka yakhe yobudala engama-79, okuyinto angeke akwazi ukuyithola uma eboshwa.
Uma eboshwa, uZuma uzoba nguMengameli wokuqala wezwe owehle wasuka ehhovisi eliphezulu wangena esitokisini sejele.