Lubhalwe nguCelani Sikhakhane
- Abaholi bendabuko KwaZulu-Natal bafundisa izinsizwa ukulwa nokuhlukunyezwa ngokobulili nokuvikela imiphakathi yazo.
- Ukuqeqeshwa kuhlanganisa amakhono okulima ukuze izinsizwa zikwazi ukutshalela izikole zasendaweni.
Amakhulu ezinsizwa zasoGwini oluseNingizimu KwaZulu-Natal ezithathwe emikhandlwini yoMdabu eyahlukene kule mpelasonto zizofundiswa ngenhlonipho nangendlela yokuvikela imiphakathi yazo.
Izinsizwa zizoqhamuka kwaMachi, Oshabeni, kwaNdelu, kwaQwabe, eMgangeni naseSinyameni.
Abaholi bendabuko oGwini oluseNingizimu KwaZulu-Natal bafundisa izinsizwa ukuthi zingalwa kanjani nodlame lobulili nokuvikela imiphakathi yazo ngendlela yendabuko.
Lo mcimbi uzoba ngeSonto esigodlweni seNkosi uMthobeli Fodo eMandawe ngaseScottburgh.
Umeluleki oyimbongi yeSilo uMisuzulu kaZwelithini, Inyosi uBuzetsheni Mdletshe, uthi sekuyisikhathi sokuthi izinsizwa zifunde ngenhlonipho nokuvikela imiphakathi yazo.
“Njengoba sizoya kulo mcimbi inhloso enkulu wukufundisa izinsizwa ukuthi umuntu wesilisa kumele azibambele mathupha kanjani emphakathini wethu, sifuna zingene ensimini zidale amathuba ngomnotho wezolimo.
“Sifuna babe yisibonelo esihle ekulweni nezenzo zobugebengu nokuvikela umphakathi wethu,” kusho uMdletshe.
Ufuna izinsizwa zilime ukudla zidayisele izikole ukudla okuzodliwa yizingane.
Inkosi uFodo itshele iphephandaba lendawo i-Eyethu ukuthi amakhosi asekhathele ukugxekwa ngokungabenzeli okwanele abantu bawo.
“Njengoba sibize lo mbuthano wokuqeqesha izinsizwa ezisakhula, sifuna nokwakha ikhasi lenkundla yezokuxhumana elizokuveza konke ukusebenza kanzima kwabaholi bendabuko abakwenzela imiphakathi yabo.
“Ngaphandle kwalokho sifuna ukuthi lezi zinsizwa ezisencane zazi izinto ezithile njengokuhlaba inkomo, ukusebenza umhlaba ngezinhloso zomnotho wezoLimo nokunye,” kusho inkosi uFodo.
Esithombeni esingenhla: Umeluleki weSilo uMisuzulu kaZwelithini Inyosi uBuzetsheni Mdletshe.
Umthombo: X