Lubhalwe nguBuziwe Nocuze
Kudutshulwe kwabulawa amadoda amabili e-Ace Epakini, eKhayelitsha, eKapa, ngesikhathi amakhasimende egijima ethukile ezama ukubalekela izinhlamvu ezindizayo.
Kulesi siphithiphithi ngemuva kwalesi sigameko, amasela antshontshe inyama notshwala ezimotweni kanti amakhasimende abethukile bathola ukuthi izimpahla zabo azisekho.
Ubusuku bokuphuza nokudansa buphenduka isigameko esibi lapho amadoda amabili edutshulwa abulawa e-Ace, ebizwa nangokuthi Epakini, kuSpine Road eKhayelitsha.
Amakhasimende agijima macala onke njengoba kuqhume izibhamu ngemva nje kuka-4 ekuseni ngoMsombuluko.
UNangamso Mveni (35) uye emotweni yakhe ngesikhathi ezwa kuqhuma izibhamu.
Uthi ubebaleka ngoba esaba ukushaywa yinhlamvu ephaphalazayo. “Ngathandaza ngesikhathi ngigijima ngoba bengingazi ukuthi izibhamu ziqhamukaphi,” kusho uMveni.
Omunye umlisa kule ndawo yokucima ukoma uthi uzwa ukuthi laba ababili abashonile bebesanda kufika besuka eSite C bezothenga inyama. Uthi akazi noma iyiqiniso yini le ndaba, kodwa ukhathazekile ngokuthi abantu abangenacala bangase balimale. Njengoba abantu bebebaleka, amasela asebenzisa leli thuba.
Bagasela ezimotweni ezimile, bazisiza ngokudla inyama notshwala. Ufakazi uthi amakhasimende abuya athole ukudla notshwala kungasekho.
U-Amanda Vikela (39) uthi akuqali ukudubula kule ndawo. Ukhumbula owesilisa owadutshulwa washona ngemuva kokuqhamukela kowesifazane egilwa yisoka lakhe.
Okhulumela amaphoyisa aseWestern Cape uSergeant Wesley Twigg uthi amaphoyisa aseLingelethu West avule amacala amabili okubulala. UTwigg uthi amaphoyisa athole amadoda edutshuliwe kanti abezimo eziphuthumayo baqinisekisa ukuthi bobabili bashonele endaweni yesigameko.
UConstable Ndakhe Gwala uthe amaphoyisa abophe abasolwa ababili abaneminyaka engu-40 no-31 ubudala, bazovela eNkantolo yeMantshi yaseKhayelitsha uma sebethweswe amacala.
Esithombeni esingenhla: Kudutshulwe kwabulawa amakhasimende amabili e-Ace Epakini elokishini laseKhayelitsha, eKapa.
Umthombo wesithombe: UBuziwe Nocuze