Lubhalwe nguRorisang Modiba
Abaphathi bama-Crown Gospel Music Awards ka-2024, azoba ngoLwezi, sebememezele ukwandiswa kwesibalo sabazoqokelwa izindondo zomculo wevangeli kulo mcimbi ngokufaka nabakwamanye amazwe.
Sekuzoba nabaculi abavela emazweni ase-Afrika, abahlala eMelika, e-Caribbean naseYurophu esigabeni esisha esithi “Best of Afrika”.
Umcimbi wemiklomelo uzohlonipha umsunguli uZanele LaMbokazi-Nkambule kanti uzokwethula izinguquko ezithokozisayo.
UMbhishobhi Mpendulo Nkambule, ongumdidiyeli omkhulu wezindondo nomyeni kaLaMbokazi-Nkambule, wethule uphawu olusha (logo) wathi imiklomelo izogcina izinga layo eliphezulu.
Umcimbi uzoba ngomhlaka-24 kuLwezi e-Gallagher Convention Centre e-Midrand, eNingizimu Afrika.
Ukuqokwa kwabaculi kuvuliwe kuze kube umhlaka-10 kuMfumfu, kanti umcimbi wokumenyezelwa kwabaqokiwe uzobanjwa mhlaka-30 kuMfumfu.
ULaMbokazi-Nkambule ongumsunguli wale miklomelo nobephinde abe ngumsakazi wakumabonakude nomsakazo oyintandokazi, udlule emhlabeni eneminyaka engu-52 ngomhlaka-12 kuNcwaba esibhedlela i-Parklands eGoli ngemuva kokuxinwa wumdlavuza wamaphaphu.
Osesithombeni ngenhla: UZanele LaMbokazi-Nkambule.
Umthombo: Instagram