Celani Sikhakhane
Isikhundla somholi wamabutho akwaZulu asikabi namuntu selokhu kwaxoshwa uMgilija Nhleko ngenyanga edlule.
UNhleko waxoshwa ngemuva kokuthi ehole Amabutho ukuba ayokweseka owayenguMengameli wezwe, uMnu uJacob Zuma, emzini wakhe oseNkandla ngaphambi kokuboshwa.
Lokho wakwenza ngaphandle kolwazi lweNkosi uMisuzulu kaZwelithini.
Emasontweni amabili edlule uNhleko wajikiswa ngesikhathi eya esigodlweni saKwaKhangelamankengana eyoxolisa eNkosini.
Waletha inkomo njengesipho.
Usihlalo woMkhandlu Wendabuko Usuthu uDkt uDumisani Khumalo uthe ukuxoshwa kukaNhleko kusamile.
“Ukuxolisa kukaNhleko akukakhulunywa. Sizobiza umhlangano ngoLwesithathu ukuze sikhulume ngokuxolisa kwakhe,” kusho uKhumalo.
NgoNtulikazi, uNhleko wabizelwa KwaKhangelamankengana ukuzobhunga ngalolu daba. Kodwa akazange aye kulo mhlangano.
Kunalokho wenza imibono eyamfaka enkingeni noMntwana uMangosuthu Buthelezi.
Ukuxoshwa kukaNhleko kuphinde kwagqugquzelwa yingxoxo yakhe nohlelo lwe-SABC i-Cutting Edge, lapho ayebuza khona ngokufaneleka kweNkosi iSilo uMisuzulu kaZwelithini.
“Ake ulinde umhlangano wethu lapho kuzodingidwa khona udaba lukaNhleko,” kusho uKhumalo.