Menzi Magubane
I-Orlando Pirates ibuye ngesitayela ngesikhathi inenebula ngo-2-0 iMaritzburg United kowe-DStv Premiership e-Orlando Stadium.
Le mpumelelo ize ngesikhathi esifanele eqenjini, ngemuva kokwehlulwa kwabo ngo-1-0 yizimbangi zabo zase-Soweto iKaizer Chiefs esikhathini esingaphansi kwenyanga edlule.
UVincent Pule, oshaye amagoli amabili uthe kubalulekile ukuthi bathole amaphuzu aphezulu kuMaritzburg. Bekuwumdlalo weshumi weligi iBucs ewunqobe kule sizini.
“Ekhaya sekunesikhathi eside singahlulwa futhi siyazethemba uma sidlala lapha,” kusho uPule.
“Sinenqwaba yabanqobi eqenjini. Besazi ukuthi iMaritzburg izodlala kanzima. Kodwa nathi sazimisela.”
Le mpumelelo inyusele iPirates endaweni yesine – ibambene ngamaphuzu angama-38 neGolden Arrows.
IPirates njengamanje isele ngamaphuzu ayisishiyagalombili kubaholi be-log iSundowns, kodwa ama-Brazilians asadlale imidlalo emibili kunamaBhakabhaka.
Amabhakabhaka azothola isonto lonke lokuphumula ngaphambi komdlalo wabo olandelayo ngoMgqibelo. Bazobhekana neSwallows esendaweni yesihlanu emdlalweni we-Soweto Derby e-Dobsonville Stadium.
Ngaphambi kokubhekana nePirates, iSwallows izodlala neBloemfontein Celtic ngoLwesibili eDr Petrus Molemela Stadium ngehora le-5 ntambama.
Umthombo wesithombe: @kickoffmagazine