Ama-Spar Proteas aphinde ashaya iqembu lase-Uganda

Timmy T Maranda

Inqubekela phambili enhle yeqembu lebhola lomnqakiswano laseNingizimu Afrika iyaqhubeka njengoba beqopha ukunqoba kwabo okwesine kulandelana kwi-Spar Challenge Tri-Nations.

Ama-Proteas abehola phambili ngamaphuzu angama-20-18 ngesikhathi sekhefu, kodwa bakwazile ukuvula igebe lamagoli ayisithupha ekugcineni, banqoba ngo-43-36 bebhekene neqembu lase-Uganda i-She-Cranes.

Udlale kahle kakhulu uMonique Reyneke. Ukusebenza kwakhe ngokuzimisela kuholele ekutheni athole umklomelo wakhe wesibili wokuba umdlali ovelele.

Ukungena kuka-Izette Griesel kanye noKhanyisa Chawane enkundleni kwenze umehluko omkhulu emdlalweni we-Spar Proteas. Labadlali badlale ngamandla okubenze bahlula uhlelo lomdlalo we-She-Cranes.

Umqeqeshi uDorette Badenhost ukholelwa ukuthi imidlalo eminingi efana nale izokwenza iqembu libe ngcono kakhulu.

UBadenhost utshele i-Netball SA Media ukuthi ukuqala umdlalo akuyona into efanele abadlali abasebancane.

“Besazi ukuthi i-Uganda izosidlalisa kanzima ngoba lona bekuwumdlalo obaluleke kakhulu,” kusho uBadenhost.

“Basifakele ingcindezi – ikakhulukazi abadlali abasebancane abebedlala phakathi nendawo kodwa abadlali asebemnkantshubomvu bakwazile ukweseka abadlali abasha ngendlela efanelekile,” kusho uBadenhost.

“Ngijabule kakhulu ngendlela iqembu elisebenzisana ngayo.”

Elakuleli linqobe i-Uganda ngo-49-34 emdlalweni wabo wokuvula ngoLwesine.

Ama-Proteas azobe elindele ukunqoba uma esedlala ne-Namibia ngoLwesibili ne-Uganda ngoLwesithathu emidlalweni yokugcina.

Umcimbi wemiklomelo uhlelelwe uLwesithathu e-Cape Town International Convention Centre ngo-5.30 ntambama.

Umthombo wesithombe: @NetballSA