Lubhalwe nguRazeen Gutta
Ukuwina kwe-Arsenal ihlula i-Nottingham Forest kubuyisele leli qembu esicongweni se-Premier League kanti uMarcus Rashford wenze okwanele ukusiza i-Manchester United ukuthi ihlule i-West Ham.
UGabriel Martinelli utholele i-Arsenal igoli lokuhola ngemuva kwebhola elihle likaBukayo Saka; kanti ngesikhathi isiwombe sokuqala siphela ngo 1-0 nje, bekulindelwe lukhulu kwi-Arsenal esiwombeni sesibili.
Ukube i-Nottingham Forest ike yazama ukuphupha ngemuva kokushaya i-Liverpool ngesonto eledlule, lawo maphupho ashabalale ngokushesha ngesikhathi uReiss Nelson efika e-Emirates.
Lo mdlali (22) udlale okokuqala kwiligi kule sizini kulandela ukulimala kukaSaka; kanti amagoli amabili emizuzwini emithathu aqede umdlalo ohlangothini lukaMikel Arteta.
UThomas Partey ushaye igoli lesine ngesikhathi uGabriel Jesus ongene endaweni kaMartin Odegaard eshaya igoli lesihlanu ngemuva kwemizuzu engaphezu kweyishumi engene enkundleni.
Ukuwina ngo 5-0 kubuyisela i-Arsenal esicongweni idlula i-Manchester City ngamaphuzu amabili ngemuva kwemidlalo engu-12.
E-Old Trafford, i-Manchester United ishaye igoli ngasekupheleni kwesiwombe sokuqala kanti inenebule i-West Ham ngo 1-0 emdlalweni obunzima kakhulu.
UMarcus Rashford ushaye igoli lakhe lekhulu eshayele i-Manchester United ngomzuzu ka-38 ngemuva kwebhola elihle phakathi kukaBruno Fernandes noChristian Eriksen.
UHarry Maguire no-Cristiano Ronaldo bobabili basuse ibhola, kanti ezika-Erik ten Hag zizibambe zaqina ukuvimbela noma iyiphi inkinga engahle ibe khona.
I-West Ham ifake ingcindezi emizuzwini yokugcina ngesikhathi uDavid de Gea evimba ibhola elinzima, esiza iqembu lakhe ukuthi lithole amaphuzu amathathu.
Umthombo wesithombe: @Arsenal