Lubhalwe nguRazeen Gutta
UDiogo Jota nomfowabo bashone ngesikhathi isondo lemoto yabo liqhuma eduze kwase-Zamora e-Spain, okwenza imoto yashayisa.
Abalandeli be-Liverpool babuthane ngaphandle kwe-Anfield nezimbali nezikhafu njengoba bebezohlonipha isihlabane sase-Portugal esingasekho.
Isihlabani se-Liverpool uDiogo Jota ushone engozini yemoto e-Spain ubeneminyaka engu-28.
Ingozi yenzeke eduze kwedolobha i-Zamora futhi idalwe ukuqhuma kwesondo, ngokusho kwamaphoyisa. Umfowabo, u-Andre Silva, naye ushonile.
UJota ubesanda kushada futhi ushiya umkakhe nezingane ezintathu ezincane.
Abalandeli be-Liverpool babeke izimbali, izikhafu namahembe ngaphandle kwe-Anfield. Umhlaba webhola usabele ngokushaqeka ngalezi zindaba.
Owayengumphathi we-Liverpool uJürgen Klopp, osayine uJota esuka ku-Wolverhampton Wanderers ngo-2020, uthe uphatheke kabi.
“Lesi yisikhathi lapho ngizabalaza khona. Kumele kube nenhloso enkulu, kodwa angiyiboni,” kubhala uKlopp ku-Instagram.
“UDiogo ubengeyena nje umdlali omangalisayo, kodwa futhi umngane omkhulu, umyeni nobaba onothando futhi onakekelayo. Sizonikhumbula kakhulu. Yonke imithandazo yami, imicabango namandla ikuRute, izingane, umndeni, abangani kanye nawo wonke umuntu obathandayo!”
I-Liverpool Football Club ikuqinisekisile ukushona kukaJota esitatimendeni.
Ikilabhu yazisiwe ukuthi lo mdlali oneminyaka engu-28 ubudala ushonile kulandela ingozi eyenzeka e-Spain kanye nomfowabo u-Andre,” basho.
“Iqembu angeke lisho lutho ngalesi sikhathi futhi licela ukuthi kuhlonishwe umndeni kaDiogo nomndeni ka-Andre, abangani, ozakwabo kanye nabasebenzi njengoba bezama ukubhekana nokulahlekelwa ngendlela engacabangeki.”
UJota ubambe iqhaza elikhulu kwisizini yokuwina isicoco se-Liverpool futhi wasiza i-Portugal ukuthi iphakamise indebe ye-UEFA Nations League ekuqaleni kwalo nyaka.
Esithombeni esingenhla: UDiogo Jota.
Umthombo wesithombe: @liverpoolfc