Lubhalwe intatheli yakwa-Scrolla
Umculi obaziwa ngelikaCosta Titch uchithe ubusuku bokugcina edansa esiteji eletha injabulo kubalandeli bakhe.
Okubuhlungu kakhulu ubengazi ukuthi ukudansa kwi-Ultra Music Festival eGoli kuzoba okokugcina.
Umdansi ophinde abe ngumculi uCosta Tsobanoglou owaziwa ngelikaCosta Titch (27) ushone ngoMgqibelo ebusuku ngemuva kokuquleka ngesikhathi ecula esiteji.
Kwividiyo esabalele ezinkundleni zokuxhumana, uCosta Titch ubonakala edansa ephinde ekhubeka esiteji. Kubonakala okade esesiteji emubamba emuphakamisa. Uzamile ukuqhubeka nokucula, kodwa uphinde wawa esiteji phakathi kwabalandeli bakhe nabasebenzi.
UCosta Titch obengumpetha ekuculeni amapiano ne-hip-hop, waziwa kakhulu ngezingoma ezithi-Big Flexa, i-Goat nethi-Just Do It.
Ukushona kwalo mculi owazalelwa e-Nelspruit kushaqise abantu abaningi bakuleli njengoba besanda kudlula ekulahlekelweni omunye umculi.
NgoNhlolanja umrepha u-AKA, ogama lakhe langempela uKiernan Jarryd Forbes wadutshulwa washona eThekwini. Ngonyaka odlule ngaphambi kokushona kuka-AKA ngoNhlolanja, umrepha uRikhado Makhado odume ngelikaRiky Rick wazibulala esitudiyo sakhe eGoli. Bobabili u-AKA noRiky Rick bebesondelene kakhulu noCosta Titch.
Abaholi bezimboni zomculo, osopolitiki kanye nabalandeli bazwakalise ubuhlungu ngokushona kukaCosta Titch ezinkundleni zokuxhumana.
Ividiyo engenhla: Ikhombisa uCosta Titch
Umthombo wesithombe: Instagram