Lubhalwe nguMichael Madyira
Angeke sisaphinde simbone ezinkundleni zebhola uDejan Miladinovic obengumlandeli omkhulu wePirates.
Lo mlandeli we-Orlando Pirates neBafana Bafana ushone ngemuva kokugula okungadalulwanga esibhedlela iChris Hani Baragwanath ngoLwesithathu.
Ngesikhathi ephuma e-Serbia, uMiladinovic wafika kuleli ngonyaka ka-1990 futhi washeshe waba ngumlandeli wokuqina weBafana.
Umlandeli weKaizer Chiefs, uMasilo Machaka obesondelene noMiladinovic ukuqinisekisile ukushona kwakhe ku-TimesLive.
“Konke lokhu kwenzeke ngabo-2.15 ntambama ngoLwesithathu,” kusho uMachaka.
“Benginaye esibhedlela sase-Bara futhi bengibona ukuthi uphefumula kanzima.”
UMachaka uchaze izikhathi zakhe zokugcina noMiladinovic obehlale egqoke uphawu lwakhe lokuthengisa olubhalwe ukuthi “Chomi” kanye nezibuko zelanga.
“Besihlala endaweni eyodwa. Sihambele umdlalo wekhilikithi we-SA20 ndawonye e-Wanderers esikhathini esingangenyanga eyedlule. Ngesikhathi somdlalo uthe uyagula ucela ukugoduka,”
“Ngakusasa ekuseni ebuya emdlweni wekhilikithi waphuthunyiswa esibhedlela.
Bengicabanga ukuthi kuzoba izinsuku ezimbili noma ezintathu, kodwa wahlala khona ngaze ngezwa izolo ukuthi usedlulile emhlabeni.”
UMiladinovic odume ngelika-“Malaga” ubeyilungu lekomidi le-South African National Supporters Union (Sanasu) eliholwa isihlabane seChiefs, uSaddam “Tjovitjo” Maake.
Ukhulume amazwi enduduzo umlandeli webhola owaziwayo uMama Joy Chauke owake waba ngumlandeli wePirates, kodwa manje osejoyine iRoyal AM, ungunobhala jikelele we-Sanasu.
“Lala ngokuthula Dejan Miladinovic ubungumlandeli odumile we-Orlando Pirates. Okokuqala bekunguGoodenough, manje nguwe ngiphukile emoyeni wami,” kubhala uMama Joy Chauke ezinkundleni zokuxhumana.
UMaake uke wazilela uMiladinovic oshone ngemuva kwezinyanga ezimbili kudlule emhlabeni omunye umlandeli wePirates uGoodenough “5-Skippers” Sithiole.
“Lala ngokuthula Dejan,” ebhala.
Isithombe esingenhla: UDejan Miladinovic
Umthombo wesithombe: Twitter