Lubhalwe nguMichael Madyira
Umqeqeshi we-SuperSport United, uGavin Hunt usaqhuba kahle kwisizini yakhe yokuqala ebuyile kuleli qembu lase-Tshwane.
Kumasizini amabili nje edlule, lo mqeqeshi oneminyaka engu-58 ubudala uxoshwe iKaizer Chiefs nakuba eyifake kowandulela owamanqamu e-CAF Champions League okokuqala ngqa.
Lokho kulandelwe ukuhlala kancane kwiChippa United okungaphumelelanga.
UHunt ube esebuyela kuSuperSport, iqembu alisize lakwazi ukunqoba izicoco ezintathu ze-Premier Soccer League phakathi kuka-2008 no-2010.
Njengoba ebuyile kwiSuperSport, ubonakala ezimisele futhi esebavale umlomo abamgxekayo abebecabanga ukuthi usewile.
Lo mqeqeshi onamava uhole iSuperSport yabuyela ku-CAF Confederation Cup okokuqala kusukela ngesizini ka-2016/17 ngemuva kokuhlala endaweni yesithathu ku-PSL.
“ Ngiyaziqhenya ngabafana beSuperSport nendlela abazimisele ngayo kulesizini,” kusho uHunt ecabanga ngesizini.
“Ngesizini yokuqala ngibuyile neSuperSport angikwazi ukungajabuli.”
Ukuqeda endaweni yesithathu kweqembu lase-Tshwane ku-PSL kwagcinwa ngo-2011/12.
Ukwenza isizini kaHunt ibemnandi kakhulu, uziphindiselele kuChiefs iqembu elamlaxaza lamushiya nenxeba elibi.
Ushaye iKaizer kowamanqamu weligi wesizini waphawula wathi, “Akukaze kungijabulise kanje ukuthola amaphuzu amathathu.”
Lo mphumela ube nomthelela ekutheni i-Chiefs ihlale endaweni yesihlanu.
Ngemuva kokuhlulwa kweKaizer kungenzeka ukuthi kushiye ukungabaza kwamakhono kaHunt, osezivezenjengofanelekile ukuba ngomqeqeshi ovelele wesizini ka-2022/23.
Abadlali abathathu beSuperSport, uRicardo Goss, uThepelo Maseki noShandre Campbell baphinde behlabane ngezindondo ze-PSL emikhakheni eyahlukene.
Kule sizini uHunt uyakhe kabusha iSuperSport ngaphandle kokukhipha ngisho isenti emakethe yokudayiselana ngabadlali ngemuva kokuqoka ama-agent amahhala, akazange abolekise futhi akazange akhuphule abadlali be-academy eqenjini lokuqala.
Isithombe esingenhla: Umqeqeshi weSuperSport United, uGavin Hunt ebungaza