Menzi Magubane
Umqeqeshi we-Al Ahly uPitso Mosimane kanye nonompempe uVictor Gomes bavotelwe ohlwini lwabahamba phambili e-Afrika emikhakheni yabo.
Laba bobabili baphakamisele ifulegi laseNingizimu Afrika phezulu ngoMsombuluko ngesikhathi bewina izindondo emcimbini wangowezi-2021 we-International Federation of Football History and Statistics (i-IFFHS) CAF.
UMosimane uwine indondo ye-Best Club e-Afrika kwathi uGomes wawina indondo kanompempe ohamba phambili kuzwekazi lonke.
Njengamanje leli qembu lase-Egypt alikahlulwa ku-Egypt Premier League ngemuva kwemidlalo eyisithupha. Bayiqale kahle isizini yabo ngokunqoba imidlalo eyisithupha.
Ngomsebenzi wakhe omuhle ku-Ahly, uMosimane ubhekene nenhlanhla yokunyuselwa umholo kuma-Red Devils.
UGomes ube yisibonelo esihle mayelana emkhakheni nokuba wonompempe ezwenikazi. Usephathe imidlalo eminingi ku-PSL nasemiqhudelwaneni yezwekazi ngendlela enhle nangeso elibukhali.
Lo nompempe waziwa ngokuqinisa umthetho futhi akasabi ukukhipha amakhadi nokukhipha abadlali nabaqeqeshi ngokufanayo. Okuxakayo ukuthi ngesikhathi esaku-Sundowns, uMosimane ubenokungaboni ngaso linye noGomes.
UGomes uzoba yisikhulu esihola phambili emqhudelwaneni we-CAF African Cup of Nations ezoba e-Cameroon ekuqaleni kwangonyaka ozayo.
Izwe liyaziqhenya ngalamadoda amabili ngokumela iNingizimu Afrika ngamalengiso unyaka wonke futhi impumelelo yawo ibafanele ngokugcwele.
Abanye abahamba phambili abathole izindondo ngalolu suku kube ngumdlali waphambili we-Liverpool ne-Egypt uMohamed Salah othole indondo ye-Men’s Best Player.
U-Edouard Mendy odlalela i-Senegal ne-Chelsea FC uwine indondo ye-Best Goalkeeper.
UDjamel Belmadi wase-Algeria uwine indondo ye-Best National Coach.
URiyad Mahrez odlalela i-Algeria neManchester City uwine indondo ye-Best Playmaker.
ULassina Traore odlalela i-Burkina Faso ne-Shakhar Donetsk uwine indondo ye-Best Young Player (U20)
Umthombo wesithombe: @AfricaTopSports