Abesifazane bafuna abalingani babo babenelise embhedeni

Everson Luhanga

Abesifazane bavame ukufuna usizo lomeluleki wemishado uma amadoda abo engabanaki uma kukhulunywa ngokubanelisa embhedeni.

Umeluleki uDkt Lloyd Zulu uveze ukuthi uma ethintwa yizithandani ezinale nkinga, abesilisa bavame ukumtshela ukuthi ucansi yinto yokugcina esezingqondweni zabo.

Ekhuluma ne-Scrolla.Africa, uDkt Zulu uchaze ukuthi umvalelo wesikhathi eside uholele ekutheni abantu abaningi balahlekelwe yimisebenzi, waletha izinkinga eziningi emindenini eminingi.

“Amadoda eza kimi ekhononda ngengcindezi enkulu yokondla imindeni yawo,” esho.

“Abaningi babo bebephila kamnandi ngaphambi kokufika kwe-Covid-19.”

USandile Bunjwa isiguli sikaDkt Zulu, uthe ulahlekelwe wumuzwa wakhe wokuya ocansini ngesikhathi kuqala izinga lesihlanu.

“Izinto ziqale ukuba nzima ngesikhathi izinsiza esasinazo endlini ziqala ukuphela,” esho.

“Izinto sezishintshe ngokuphelele endlini yami. Kwakunezimpi ezangikhipha ekamelweni lami elikhulu ngayolala ekamelweni lendodana yami.”

Uthe ubenengcindezi yokuthola imali yokondla umndeni wakhe.

USandile oneminyaka engama-50, uthe uthenge imishini ebizayo yebhizinisi lakhe ngoMasingana kowe-2020.

Uthe kunesikhathi lapho umndeni uze wanquma ukuhlukana kodwa ubulokhu uthola ukwelulekwa kuDkt Zulu ozinze e-Kempton Park.

UGershom Malikta uthe uDkt Lloyd uwusindisile umshado wakhe.

Lo mkhiqizi wamavidiyo oneminyaka engama-37 uthe ayikho imishado noma ezinye izinhlobo zemibuthano, okuyiyona ndlela aziphilisa ngayo.

“Ibingekho imali yokuziphilisa nomndeni wami,” esho.

“Izinto zashintsha. Ngangizizwa sengathi angisiyo indoda eyanele emndenini wami.”

UDkt Lloyd uthe amadoda amaningi angakutholi ukwelulekwa okufanele aphendukela ekuphuzeni ngokweqile kanti abanye bakhohlisa amakhosikazi abo.

“Bathola induduzo kutshwala. Labo abakhohlisayo bacabanga ukuthi izintombi zabo zilalela izinkinga zabo yize lokho kungelona iqiniso,” kusho yena.

“Ingcindezi yezezimali ngesikhathi somvalelo yenze izithandani eziningi zahlukana futhi zaba nezinkinga ezinkulu emshadweni.”