Lubhalwe ngu-Anita Dangazele
Uhulumeni wethemba ukuthi lolu hlelo luzosiza abesifazane ukuba bagweme ukuhlukunyezwa futhi bakhe izimpilo ezingcono.
Abesifazane bazothola ukuqeqeshwa, ukwelulekwa kanye nosizo lwamabhizinisi amancane ukuze bazimele ngemuva kokusinda odlameni olusekelwe kubulili.
UMnyango wezokuThuthukiswa koMphakathi e-Eastern Cape usuqale uhlelo olusha lokusiza abesifazane abasinda ebunzimeni bokuhlukunyezwa.
Uhlelo Lokuthuthukiswa Kwezomnotho Nezenhlalakahle luzofundisa abesifazane amakhono abangawasebenzisa ukuze baziphilise.
UNgqongqoshe wezokuThuthukiswa koMphakathi uBukiwe Fanta uthe lolu hlelo lunikeza abesifazane amathuluzi abawadingayo ukuze balulame futhi balawule izimpilo zabo.
Uthe abesifazane abaningi basala bengenamali nomsebenzi ngemuva kokubhekana nokuhlukunyezwa, okwenza kube nzima ukuthi baphume ezimeni eziyingozi.
“Ngokwezibalo zakamuva, owesifazane oyedwa kwabathathu eNingizimu Afrika uke wabhekana nohlobo oluthile lokuhlukunyezwa ngokobulili empilweni yakhe,” kusho uFanta.
Lolu hlelo luhlanganisa ukuqeqeshwa kokuthunga, ukupheka, amakhono e-computer kanye nokuqhuba ibhizinisi elincane. Bazosizwa nasekubhaleni ama-CV, ukulungiselela inhlolokhono nokuthola umsebenzi.
Abesifazane bazofunda ukuphatha imali futhi bangafaka izicelo zezibonelelo zokuqala amabhizinisi. Amaqembu okusekela kanye nokwelulekwa azosiza ekwelapheni kulokhu kuhlukumezeka abadlula kukho.
Umnyango ucela nezinkampani zendawo ukuthi zikhiphe amathuba emisebenzi futhi zenze izindawo zokusebenza ziphephe kulabo abasindile.
Lolu hlelo luzophinde lufundise abantu ukuthi bangakhuluma kanjani ngokumelene nokuhlukunyezwa nokweseka abasindile.
UFanta ucele uhulumeni, amabhizinisi, izinhlangano ezizimele kanye nemiphakathi ukuthi balekelele ekwenzeni lolu hlelo lube impumelelo.
Esithombeni esingenhla: UFanta nabanye besifazane emhlanganweni wokucobelela amakhono.
Umthombo wesithombe: Umnyango Wezokuthuthukiswa Komphakathi