Lubhalwe nguSihle Mavuso
Abasebenzi abasebenza ehhovisi lekhokhasi ye-ANC esiShayamthetho saKwaZulu-Natal eMgungundlovu bakhungathekile kulandela ukungayitholi imiholo yangoNhlangulana.
Abasebenzi badinwe kakhulu ukuthi le nkinga ayipheli njengoba kuthiwa i-ANC ibambezele ukuqoka isikhulu esizophatha izimali zekhokhasi esiShayamthetho.
Ukungakhokhelwa kwemiholo yangoNhlangulana kukhulunywe ngakho ngokuthula emaphaseji esiShayamthetho. Kuye kwaqinisekiswa ngokuhamba kwesikhathi ngesikhathi uZenzele Msomi oyimenenja yekhokhasi ye-ANC ethumela imemo kubasebenzi ngalolu daba.
UMsomi owake waba uNobhala we-ANC esifundeni iHarry Gwala uthe konke sekulele ehhovisi lesifundazwe.
“Sanibonani basebenzi bekhokhasi, kuyadabukisa ukunazisa ukuthi imiholo yenu ayikalungiswa ngenxa yokungakhokhelwa isiShayamthetho njengoba sisalinde iqembu lethu ukuthi libanike ifomu elisayiniwe le-Accounting Officer yethu,” kubhala uMsomi encwadini eputshukile.
Yize kunememo kaMsomi, okhulumela i-ANC esifundazweni uMnuz Mafika Mndebele uthe konke sekumi ngomumo.
“Bonke abasebenzi basehhovisi lethu bakhokheliwe, abasebenzi bekhokhasi bayakhokhelwa njengoba sikhuluma nje,” kusho uMndebele ngesikhathi ebuzwa ngalolu daba i-Scrolla.Africa.
Okushiwo nguye kamuva kuye kwachithwa ngabanye abasebenzi bethi kungamanga futhi kuyadukisa. Laba basebenzi bathe bebengakayitholi imiholo yabo yangoNhlangulana namuhla ngehora lesihlanu ntambama.
“Kungamanga, asikakaholi,” kusho omunye wabasebenzi ngesikhathi ephikisa okushiwo uMndebele.
Kukholakala ukuthi ekuphathweni kokugcina, iKhokhasi ye-ANC ebinamalungu angu-44 esiShayamthetho yabelwa u-R40-million unyaka wonke.
Esithombeni esingenhla: Ilogo ye-ANC.
Umthombo wesithombe: Facebook