Lubhalwe nguZukile Majova
UWayde van Niekerk oyintandokazi yakuleli kwezemidlalo wenze adume ngakho njengoba edle umhlanganiso ku-Diamond League ngeSonto.
UVan Niekerk, osalulama ekulimaleni edolweni okwacishe kwaqeda umsebenzi wakhe ngo-2017 useyabuyela endleleni yakhe.
Lo mpetha wama-olympics onerekhodi ku-400m uzimisele kakhulu kweye-Diamond League.
NgeSonto ugubhe usuku lwakhe lokuzalwa egubha iminyaka engu-31 ngokunqoba e-Silesia, e-Poland ngesikhathi esingu-44.08.
Lokhu kungenye intuthuko ethembisayo kusukela esikhathini esingu-44.38 asiqophe ngesikhathi ewina owe-Diamond League e-Oslo ngenyanga edlule.
Ekhaya e-Potchefstroom uqophe isikhathi esingu-44.17s ekuqaleni kwesizini.
Lezi zikhathi azisondeli neze eduze nemizuzwana engu-43.03 ayigijime kuma-Olympics Games e-Brazil ngo-2016, lapho aqopha khona irekhodi lama-Olympic nezwe. Kuze kube manje kule sizini, akekho umsubathi oseke wagijima imizuzu engu-44 ku-400m.
“Izinto zihamba ngendlela efanele. Ngikwazile ukuziqeqesha nsuku zonke. Lesi isona sikhathi esishesha kakhulu engake ngasigijima eminyakeni eyisikhombisa futhi lesi sikhathi esingu-44.0 sibonisa ukuthi imizuzwana engu-43 ingagijimeka,” ekhuluma ngokunqoba kwakhe e-Silesia.
Omunye owine indondo u-Akani Simbine ogijima u-100m. U-Akani Simbine ugijime isikhathi esingu-9.97s e-Silesia, okuwumdlalo wesibili olandelanayo kule sizini ye-Diamond League.
Umthombo wesithombe: I-Diamond League