Sandiso Phaliso
Zinqatshelwe ibheyili izinsizwa eziyi-12 ezibulale abesilisa abayisikhombisa ngesikhathi beziphindiselela ngokubahlasela.
Ngesikhathi yethula isinqumo ngoLwesibili, iMantshi ebambile uFelicia Spangenberg uvumelane nomshushisi u-Asanda Ngxafana, ukuthi ngeke kube into elungile ukudedela abasolwa ngebheyili.
Leli cala lilandela elinye elinesihluku elenzeka endaweni yase-Zingqolweni e-Eastern Cape, elaqala ngesikhathi kubulawa abahola impesheni abayi-11, kusukela ngoZibandlela.
Indawo yase-Zingqolweni manje yaziwa “njengedolobhana lokufa”.
Ekuhlaselweni okubonakala sengathi kwakuwukuziphindisela, izakhamizi zaqhubeka nokuzingela ababulali babantu abahola impesheni, zalengisa ababili zashisa amadoda amahlanu aneminyaka ephakathi kwama-21 nama-27.
La basolwa abayishumi nambili bebelokhu bevalelwe ejele kusukela ngoMbasa.
Imindeni yezisulu ezibulewe isamukele isinqumo senkantolo.
Phakathi kwabasolwa bonke abaneminyaka ephakathi kwama-36 nama-63, kukhona nowayeyikhansela likaMasipala Wendawo yase-Emalahleni, uCecil Hluphekile Bobotyane.
Abasolwa baboshwa ntambama mhla zi-14 kuMbasa.
La madoda abhekene namacala ayisikhombisa okubulala kanti ababili babhekene namacala amahlanu okubulala izisulu ezinhlanu ezishile zashona.
Okhulumela i-NPA uLuxolo Tyali uthe uphenyo lwamaphoyisa luhlobanise abasolwa namacala okubulala.
“Kusolwa ukuthi lezi zinsizwa zibulawe emini ka bha phambi kwezihlobo zazo,” kusho uTyali.
Abanye abantu asebekhulile ababili sebebulewe esigodini ngemuva kokuhlaselwa kwalezi zinsizwa eziyisikhombisa.
UThobile Sonkana, oyilungu lomndeni wesisulu esibulewe, uthe ngeke bazizwe bephephile uma bengadedelwa ngebheyili.
“Amalungu amaningi emindeni yezisulu abalekile emzini yabo besaba ukuhlukunyezwa nokusatshiswa. Ukubagcina esitokisini kuyinto efanele ukwenziwa,” kusho uSonkana.
.
