Celani Sikhakhane
UMnyango wezeMfundo eKZN ugxekwe kakhulu ngokuqasha abasizi bothisha njengothisha abaneziqu, washiya izinkulungwane zothisha abaqeqeshiwe bengenamsebenzi.
NgoLwesine abakwa-KZN Unemployed Qualified Educators (i-KZNUQE) bangene ezitaladini zaseMgungundlovu beyozwakalisa izikhalazo zabo.
UMlekeleli Radebe wale nhlangano utshele i-Scrolla.Africa ukuthi lolu daba balukhuluma nomnyango ngoNdasa odlule, kodwa ukukhathazeka kwabo kwehlele ezindlebeni ezingezwa.
Ngokusho kukaRadebe, abasizi bothisha bakhokhelwa umholo wenyanga wemali eyizi-R6 500, yize bengenazo iziqu zokufundisa ezisemthethweni.
“Manje abasasizi ngalutho. Kunalokho sebentshontsha imisebenzi yethu ngoba manje sebebekwe emakilasini bayafundisa. Sifuna iphele le nto,” kusho uRadebe.
Kuyaqondakala ukuthi kusungulwe uhlelo olusha lokuqasha ukuze kuthathwe bonke othisha abaqeqeshiwe abafuna imisebenzi “kodwa ayisebenzi” kusho uRadebe, njengoba bengakwazi ukufaka imininingwane yabo ohlelweni futhi balwela ukubhalisa noma ukungena kwi-web yokubhalisa.
NgoLwesine ababhikishi bathe bafuna uMnyango uqinisekise ukuthi i-software isebenza kahle.
Baphinde banxusa uMnyango ukuthi uqinisekise ukuthi izikhala zezinga lokuqala ziyakhangiswa ngemibhalo enezinhlamvu ezibonakalayo, ukugwema ithemba lokuthi abasizi abafundisayo bathole izikhundla ezihloselwe abafanele ukuqeqeshwa kuphela.
UDkt Barnye Mthembu, oyiNhloko yoMnyango obambile, uqinisekise ababhikishi ukuthi umnyango uzozama ukulungisa izinkinga zabo ngokushesha okukhulu.
UMnyango uke wakusho phambilini ukuthi wawungalindelanga ukuthi kube nesibalo esiphezulu kangaka sabantu abafaka izicelo ngesikhathi wenza uhlelo lwe-inthanethi. Uxazulule ngokubhekana nalolu daba futhi wamemezela ngomhla ziyi-12 kuNdasa ukuthi uhlelo lokusebenza selulungisiwe futhi seluyasebenza.