Celani Sikhakhane
Okwesibili kuleli sonto abashayeli bamaloli bemisa uthelawayeka u-N3 ophakathi kwase-Gauteng naKwaZulu-Natal ngoLwesine.
Abashayeli bamaloli bebekhala ngezinto ezimbili, ukuqashwa kwabantu bakwamanye amazwe kanye nokunyuka kukaphethiloli. Sebesabise ngokuqhubeka nokuvala umgwaqo omkhulu uma izinkinga zabo zingalungiswa.
Amaphoyisa abematasa ezama ukulawula isimo e-Tweedie ngase-Howick ku-N3 obheke enyakatho.
Kwenzeke okufanayo ngoMsombuluko ngesikhathi abashayeli bamaloli bevale lo mgwaqo.
Isimo besingalawuleki ngisho nase-Van Reenen’s Pass ngakoThukela njengoba amaloli abevimbe zonke izimoto.
Ihhovisi likaKhomishana wamaPhoyisa eKZN uNhlanhla Mkhwanazi likhiphe isitatimende esithi kumele kuboshwe wonke umuntu obambe iqhaza kulokhu kuvinjwa komgwaqo.
Ku-R74 e-Bergville izimoto ezincane beziyalelwa ukuthi zihambe kwenye indawo zisuka ku-N3 ngenxa yesimo esibi somgwaqo.
Impi yokuqashwa kwabashayeli bamaloli bakwamanye amazwe izinkampani zakuleli isineminyaka iqhubeka.
Ngonyaka ka-2019 izinkampani zamaloli zalahlekelwa izigidigidi zamarandi ngemuva kokuthi abashayeli abebengeneme bangena ku-N3 e-Howick bashisa amaloli.
UNgqongqoshe wamaPhoyisa uMnu uBheki Cele uzamile ukungenelela ngokuhlangana nabanikazi bamaloli eThekwini. Lowo mhlangano udale ukuthukuthela kubashayeli bamaloli abebekhala ngokuvalelwa ngaphandle uCele.
USihlalo we-All Truck Drivers Foundation uMnu Sipho Zungu usabise ngokuthi ngeke uphele umbhikisho uma izikhalo zabo zingasukunyelwa.
I-fuel levy idala umsindo ezweni lonke manje. Imboni yamatekisi nayo ikhala ngokuthi ayikwazi ukuqhubeka nebhizinisi njengenjwayelo ngenxa yokumba eqolo kukaphethiloli osekuholele ekutheni kunyuke amanani emali yokugibela nezinsimbi zezimoto.
.
