Menzi Magubane
Ukuhlulwa kwe-Ghana idlala ne-Morocco emdlalweni wokuvula we-African Cup of Nations (Afcon) ngoMsombuluko kulethe injabulo kubathandi bebhola baseNingizimu Afrika.
Abantu baseNingizimu Afrika abakaxoli ngokwenziwa i-Ghana ngesikhathi iguqisa iBafana Bafana ngoLwezi ngonyaka odlule. Lokho kwaholela ekutheni iBafana yehluleke ukungena emidlalweni yendebe yomhlaba ye-FIFA ezoqala ngasekupheleni kwalonyaka.
IBafana Bafana yazama ukusebenzisana ne-South African Football Association (Safa) ukuze baphikise isinqumo ebesiyindida kakhulu kodwa leso sicelo sachithwa.
Ukuhlulwa kwe-Ghana ngoMsombuluko kujabulise abalandeli bebhola baseNingizimu Afrika. Empeleni noma iliphi iqembu elizonenebula i-Ghana kulo mqhudelwano lizoba ngabangani beNingizimu Afrika.
Ngemuva komdlalo wangoMsombuluko abalandeli bebejabule kakhulu ezinkundleni zokuxhumana.
“Sibonga i-Morocco ngokushaya i-Ghana. Seningabangani nabalandeli beBafana Bafana,” kusho umlandeli ebhale ku-Twitter.
Omunye umlandeli uthe sibonga i-Morocco, lezi zigebengu zase-Ghana akumele zingene kulamaqembu angu-16 azokhethwa ngenxa yento ezayenza kuBafana Bafana.”
Oziqoke ukuba ngumlandeli wokuqala weBafana, uSaddam Maake, ubhale wathi: “Tjovitjo, kwaze kwamnandi ukubonai-Ghana inenebulwa i-Morocco ngoMsombuluko ebusuku. Waphetha ngokuthi Viva Morroco”.
Omunye osebenzisa u-Twitter ubhale ukuthi ziyakhalake manje e-Cameroon, izikhulu zase-Ghana azikwazanga ukufumbathisa wonke umuntu. Ngibonga uMdali ngokuthi bahluliwe . Ngizoqamba ingane yami ngokuthi uMorocco,” kusho uNMochelete.
Emdlalweni wabo olandelayo i-Ghana izobhekana ne-Gabon esendaweni yesibili ngoLwesihlanu bese kuthi ngoLwesibili oluzayo idlale ne-Comoros emdlalweni wokugcina ka-Group C.
I-Morocco izobhekana ne-Comoros ngoLwesihlanu, kanti i-Gabon ngoLwesibili oluzayo izoqedela umkhankaso wayo wokuhlungela amaqoqo.
Umthombo wesithombe: @CafOnline