Menzi Magubane
Abalandeli be-Moroka Swallows bacikekile. Bafuna umqeqeshi uBrandon Truter aphume esidlekeni sakhe. Esikhundleni sokundiza, iDube birds ikhasa kude kakhulu kule sizini.
I-Swallows inqobe kanye kuphela emidlalweni eyi-11 kule midlalo ye-DStv Premiership futhi iqoqe amaphuzu ayisishiyagalombili yadlala ngokulingana emidlalweni emihlanu yahlulwa kwemihlanu.
Bangene shi emsileni ngephuzu elilodwa nje vo elibahlukanisa ne-Marumo Gallants, esemsileni. Kodwa-ke i-Gallants inomdlalo owodwa okumele iwudlale kanti uma iwunqoba ingashintshana ne-Swallows ngendawo etafuleni.
Ngesizini edlule, ngemuva kwemidlalo eyi-11, i-Swallows ayizange ihlulwe njengoba yaqoqa amaphuzu angama-25. Yanqoba imidlalo eyisikhombisa yadlala ngokulingana kwemine kanti kubukeka sengathi ibifuna ukuphonsa inselelo kusicoco.
NgeSonto ntambama abalandeli be-Swallows babhikishe mayelana noTruter ngaphandle enkundleni yezemidlalo iMbombela eMpumalanga bephethe izingqwembe ngaphambi komdlalo wabo ne-TS Galaxy.
Okwenza izinto zibe zimbi kakhulu kuTruter, i-Swallows ihluliwe nakulowo mdlalo, futhi lokho kungase kugculise abaphathi beqembu ukuthi bacabangele isidingo sabalandeli. Ngenyanga edlule uTruter umiswe amasonto amabili ngabaphathi beqembu ngemuva kokungawuqali kahle lo mkhankaso.
USimo Dladla wabamba izintambo eqenjini, kodwa akukho okushintshile. UTruter wafika, kodwa namanje akukho okushintshile. Uma abalandeli benendlela abangenza ngayo, ukuhlala komqeqeshi ekilabhini kuzophela maduze.
Khonamanjalo, ngeSonto i-Baroka FC ibuyisele uKgoloko Thobejane esikhundleni sokuqeqesha. Owaduma ngesisho sakhe esithi, “Ibhola lingakubulala, ufe okwangempela”, uThobejane uthathe izintambo kuMatsimela Thoka, osengene eqenjini leqembu le-Diski Challenge.
Laba bobabili bashintshane ngesikhathi uThobejane eqeqesha iqembu le-Diski. I-Baroka nayo inephuzu elilodwa ngaphambi kwe-Gallants, i-Swallows kanye ne-Galaxy.
Bonke babambene ngamaphuzu ayisishiyagalombili kanti ukungenzi kahle emidlalweni yabo yaphakathi nesonto kungenza omunye wabo asale emsileni.
Umthombo wesithombe: @skhumba