Abakwa-Gupta bazokhalelwa amasango kasigonyela

Kabelo Tlhabanelo

Isiphathimandla sezokushushisa kuzwelonke sinxuse abe-Interpol ukuba basize ekukhipheni izincwadizokubophaizelamani zakwaGupta kanye namakhosikazi azo.

Lokhu bekungabona ukuboshwa kuka-Atul, nomkakhe uChetali; noRajesh nonkosikazi wakhe u-Arti okubikwa ukuthi base-Dubai ngemuva kokubaleka kuleli ngowezi-2018.

Isiphumile futhi incwadi egunyaza usomabhizinisi osebenzisana nabakwaGupta u-Ankit Jain, owayesayine i-akhawunti yakwa-Nulane Investment Bank of Baroda; uRavindra Nath, umqondisi we-Wone Management (Pty) Ltd; uRamesh Bhat noJagdish Parekh, abaqondisi be-Pragat Investments (Pty) Ltd.

Lokhu kumayelana nezigidi ezingama-R25 ezasetshenziswa ocwaningweni lokuthi kutholakale ukuthi kungenzeka yini ukuthi kuphumelele ipulazi lobisi i-Estina e-Free State.

NgoLwesine, umlingani wakwaGupta u-Estelle de Lange kanye nezikhulu ezintathu zikahulumeni wase-Free State bavele ngaphambi kwemantshi yase-Bloemfontein ngamacala okukhwabanisa afinyelela kwizigidi ezingama-R24.

Usomabhizinisi u-Iqbal Sharma, owayeyinhloko yoMnyango Wezokuthuthukiswa Kwezindawo Zasemakhaya e-Free State, uPeter Thabethe, owayeyinhloko yoMnyango Wezolimo e-Free State nongumphathi we-Bloem Water njengamanje uLimakatso Moorosi kanye nowayengumphathi we-CFO wase-Free State Agriculture uSeipati Dhlamini, bonke basolwa ngokukhwabanisa ngokuthengwa kwempahla okubandakanya i-Estina Farm.

Laba bobane baboshwe ngoLwesithathu kanti bavele eNkantolo yeMantshi yase-Bloemfontein ngoLwesine.

Befake amaketanga emaqakaleni, abasolwa bavele bephuma esitokisini.

UMnyango wezoLimo esifundazweni ukhokhele le nkampani i-Nulane Investment 204 (PTY) LTD, okuyinkampani eephethwe nguSharma, umngani wakwaGupta.

Ukusuka lapho, izimali zadluliselwa e-Islandsite Investments 180 (Pty) Ltd (Islandsite), inkampani ephethwe ngumndeni wakwaGupta.

Ngokusho kokhulumela isiphathimandla sezokushushiswa kuzwelonke uSindisiwe Seboka, indlela yokusebenza esetshenziswe kuleli cala kubonakala sengathi iyenziwa kweminye iminyango kahulumeni namaphrojekthi.

“Ngakho-ke kubalulekile ukuthi ubufakazi obuqoqwe ngalolu daba bulethwe enkantolo bese kukhishwa isinqumo ngokushesha.

“Kungenxa yalesi sizathu abashushisi banqume ukuqhubeka ngokwehlukana babhekane nabasolwa abakhona ezweni nakwamanye amazwe, njengoba inqubo yokuboshwa kanye nokubuyiselwa kwamanye amazwe ingase ibambezele icala ngokungafanele,” kusho uSeboka.

UThabethe noSharma bazobe bechitha impelasonto bevalelwe njengoba kuzofakwa isicelo sabo sebheyili ngokusemthethweni ngoMsombuluko mhla zi-7 kuNhlangulana.

UMoorosi noDhlamini banikezwe ibheyili yezi-R10,000 umuntu ngamunye.