Lubhalwe ngu-Anita Dangazele
Amavolontiya e-ANC kanye nobuholi obuphezulu beqembu bathathe umkhondo wabo baya emabandleni ahlukene ezindaweni zase-Eastern Cape ngeSonto.
Amabandla kulo lonke izwe ebegubha iSonto elingcwele ngaphambi kwePhasika, usuku uJesu Kristu afika ngalo eJerusalema ngesikhathi amukelwa ngobuqhawe egibele imbongolo.
UMengameli uCyril Ramaphosa ephelezelwa ngamalungu esigungu esiphezulu seqembu (NEC), uMamoloko Kubayi, u-Aaron Motsoaledi, uMdumiseni Ntuli kanye noNdunankulu wase-Eastern Cape u-Oscar Mabuyane baqale umkhankaso wabo ngenkonzo yesundu esontweni lamaSheshi i-Holy Spirit Kwazakhele, e-Gqeberha.
Khonamanjalo, uNobhala-Jikelele we-ANC, uFikile Mbalula ehambisana noNobhala we-ANC esifundazweni uLulama Ngcukayitobi kanye neMeya yase-Buffalo City, uPrincess Faku bavakashele ibandla i-Faith Alive Bible e-East London.
USihlalo kazwelonke waleli qembu, uGwede Mantashe kanye nowayenguNdunankulu wase-Eastern Cape uPhumulo Masualle bavakashele ibandla le-Corhana Anglican ngaphandle kwaseMthatha.
Ngesikhathi enikezwa inkundla, uMengameli uRamaphosa ushintshele esimweni sokukhankasa, wamema abazalwane ukuba bacabange ngeminyaka engu-30 yenkululeko nentando yeningi.
Njengoba kwakungakabibikho okuningi ngehlandla lakhe lokuqala elaligcwele ubhubhane lwe-Covid-19, imithetho yokucishwa kukagesi nokulahleka kwemisebenzi, uRamaphosa uzame ukudweba isithombe esihle ngohulumeni we-ANC.
“Kuthathe i-ANC iminyaka engu-82 ngaphambi kokuthi igcine iphumelele ukuhola abantu bakithi emzabalazweni wamalungelo abantu. Ngakho ngimi lapha namuhla ukunimema ukuthi nizokhumbula amalungelo atholwa ngo-1994,” kusho uRamaphosa.
Ekhuluma ngaphandle kwebandla i-Holy Spirit Anglican Kwazakhele ngemuva kwenkonzo yesundu ngeSonto, uRamaphosa uthe ukuhambela kwakhe eNelson Mandela Bay kumkhombise ukuthi iqembu lisakuthokozela ukwesekwa okukhulu esifundazweni futhi liyakhula entsheni.
“Yilokhu engikujabulele kakhulu, ukuxhumana nentsha futhi namhlanje ekuseni ngixoxe nabaholi bezenkolo kanye namabandla abo. Kube isikhathi esihle kakhulu lapho ebesicela khona ibandla ukuthi likhulekele uhulumeni, aphinde akhulekele nokhetho,” kusho yena.
Esithombeni esingenhla: UMengameli uCyril Ramaphosa ekhuluma nebandla e-Gqeberha ngeSonto.
Umthombo wesithombe: Sithunyelwe