Lubhalwe ngu-Anita Dangazele
Izakhamizi zase-Eastern Cape zithi izibhedlela kulesi sifundazwe azinayo imithi eyanele noma izinsiza zokusebenza.
Isibhedlela i-Maclear kanye ne-Nelson Mandela Academic ziqokwe njengezibhedlela ezihlinzeka ngosizo olusezingeni eliphansi kwiziguli.
Izigameko eziningi – kusukela ekutheni kushoda imishanguzo kanye nokungaziphathi kahle – kushiye iziguli zizizwa zingakwazi ukusizakala.
Iziguli zithi kujwayelekile ukuphuma esibhedlela e-Eastern Cape ngaphandle kokuthola usizo lwezempilo olufanele.
UNksz Zukile Mbizweni, indodakazi yakhe engeniswe esibhedlela i-Maclear uthe indodakazi yakhe ayikwazanga ukwelapheka ngenxa yokushoda kwemishanguzo.
“Isisu sendodakazi yami siqale ukuvuvukala futhi umama wayo uye wabiza umhlengikazi. Umhlengikazi ube esebiza udokotela obengekho esibhedlela ngaleso sikhathi. Umhlengikazi ubuyele kithina wathi udokotela uthe ngeke akwazi ukunakekela ingane ngoba imithi ayikho,” kusho uMbizweni.
Esinye isiguli, uXolelwa Bulehluthi osengumuntu ohlezi elele embhedeni, usola isibhedlela iNelson Mandela Academic, eMthatha.
“Nganginezihlungu emadolweni. Ngaya emtholampilo izikhathi eziningi ngaphambi kokuba ngidluliselwe esibhedlela iNelson Mandela Academic. Lapho, bangihlolela umdlavuza wamathambo. Angikwazanga ukusukuma ngemuva kwalokho. Ngatshelwa ukuthi ngizivocavoce ekhaya kodwa angikwazanga ukusukuma kusukela ngo-2022,” kusho uBulehluthi.
Okhulumela uMnyango wezeMpilo e-Eastern Cape, uSiyanda Manana uthe uMbizweni bekumele axhumane nesikhulu sesibhedlela uma engeneme ngokuziphatha kukadokotela.
Odabeni lukaBulehluthi, uthe “Ngesimo sesiguli samanje, akukho okuhlobene nokuhlolwa kwe-biopsy okwenziwa.”
Njengomyalelo wakhe wokuqala, uNgqongqoshe wezeMpilo esifundazweni uNtandokazi Capa uvakashele uBulehluthi ukuyokhuluma ngezikhalo zakhe ngoMsombuluko.
“Ngike ngakhuluma nomphathi wesibhedlela, ngabona efayeleni ukuthi isiguli sanakekelwa ngendlela efanele nokuthi udokotela wayetholakala ngesikhathi isiguli esasilaliswe ngaso esibhedlela,” kusho uCapa.
“Ngicabanga ukuthi kube nokungaboni ngaso linye phakathi kwabazali besiguli nabahlengikazi. Abazange bachaze kahle ukuthi isiphi isikhathi esidingekayo sokwelashwa nokuthi kuzothatha isikhathi esingakanani ukusebenza.”
Esithombeni esingenhla: Isibhedlela iNelson Mandela Academic.
Umthombo wesithombe: Nelson Mandela Foundation