Razeen Gutta
Iqembu lesizwe lebhola lezinyawo lase-Senegal lamukelwe njengamaqhawe ngesikhathi bebuyela e-Dakar ngemuva kokuwina indebe yabo yokuqala yamazwe ngamazwe.
UMengameli wase-Senegal uMacky Sall uluhoxisile uhambo lwakhe lokuya e-Comoros ukuze aqinisekise ukuthi uyatholakala ukuze amukele iqembu elibuyela ekhaya ngoMsombuluko ntambama.
Umdlali ngamunye uklonyeliswe ngomhlaba ongu-700 square meter yihhovisi likaMengameli kanye nesamba semali ngokuhlonipha i-Senegal, kanti i-National Order of the Lion yenzelwe umcimbi wokugubha e-Palace of the Republique.
UMengameli umemezele ukuthi lolu suku luzoba iholidi likazwelonke lokugubha ingqophamlando yokunqoba.
“Njengobufakazi bokubonga kwethu, nasegameni lesizwe, abadlali kanye namanye amalungu ethimba elisemthethweni ngamunye bazothola ibhonasi ekhethekile ka-R1.3 million, kanye nesiqephu somhlaba esingu-200 square meter e-Dakar,” kusho uMengameli uSall.
“Bazophinde bathole indawo engu-700 Square meter esifundeni sokuqala sedolobha elisha lase-Diamniadio.”
Uthe le ndebe ikhombisa ukubekezela.
“Besikufisa kakhulu. Besiphupha ngakho njengoba kwakwenziwa izizukulwane ezingaphambi kwethu,” kusho uMengameli.
Isihlabani se-Liverpool, uSadio Mané, oklonyeliswe njengomdlali ovelele, uthe lena bekuyimpumelelo yakhe enkulu okwamanje.
“Usuku oluhle kakhulu lwempilo yami kanye nendebe ilethe injabulo kakhulu empilweni yami. Ngiwine i-Champions League kanye nezindebe ezithile kodwa lena ikhethekile kumina,” etshele i-Eurosport.
“Lokhu kubaluleke kakhulu kumina. Ngizijabulela mina, abantu bami kanye nomndeni wami wonke. Indebe ngeyeqembu lonke lase-Senegal. Wonke umuntu kumfanele ukuyithola,” kusho uSadio Mane.
Ukunqoba kwabo kwenzeke ngemuva kwempi enzima ne-Egypt eyaze yafinyelela kumaphenalthi.
Umthombo wesithombe: @Goal
.
