Abadlali baseCongo nomlando kwiChiefs 

Lubhalwe nguMichael Madyira

IKaizer Chiefs inomlando wayo ngabadlali base-Democratic Republic of Congo (DRC) kulandela ukusayiniswa kukaChristian Saile Basomboli.

Lo mlando uqhakaza kakhulu njengoba abadlali baphambilini base-Congo benza kahle kwiChiefs.

NgoLwesine, leli qembu lase-Soweto limemezele ukuthi lisayinise uBasomboli odlalela i-Nchanga Rangers yase-Zambia.

Lo mdlali (22) ufike kwi-Premier Soccer League kungazelele muntu kanti kudingeka ukuthi enze kahle ukuze ajabulise umqeqeshi weChiefs, u-Arthur Zwane.

Ngokungafani nabadlali bangakubo abake bagijima kwiChiefs, uBasomboli akakaze abonakale eqenjini lesizwe lase-Democratic Republic of Congo.

Esikhathini esifushane esedlule ubedlala esigabeni esiphansi e-Zambia kanti amagoli akhe angu-19 asize i-Nchanga Rangers ukuthi ikhuphukele kwiligi ephezulu.

Onke amehlo athe njo kuBasomboli ukuthi angaba umdlali ovelele yini weChiefs odabuka e-Congo.

I-Scrolla.Afrika sibheka ukuthi abadlali bakudala beChiefs abadabuka e-Democratic Republic of Congo benzenjani e-Naturena.

U-Eshele Botende

Lo nozinti osewathatha umhlalaphansi owafika kwiChiefs ngo-1994 wayishiya ngemuva kweminyaka emibili ngemuva kokuphakamisa i-National Soccer League (manje esiyi-PSL).

Umdlali onolaka uBotende wake wathola ikhadi eliphuzi ngokunqaba ukubuyela phakathi kwamapali ngesikhathi sekukhahlelwa amaphenalthi emdlalweni we-Soweto Derby bebhekene ne-Orlando Pirates.

Okuthokozisayo ukuthi omunye wemidlalo yeqembu lakhe kwakungesikhathi bebhekene neBafana Bafana emdlalweni wokuhlungela iNdebe yoMhlaba ye-Fifa ngo-1998.

IChiefs ikhulise igama lakhe njengoba aya kwi-Maritimo yase-Portugal njengoba ixhumene ne-West Ham United.

U-Emeka Mamale

UMamale wasayiniswa iChiefs esuka kwiQwaQwa Stars ngo-2000 ngemuva kokudlala e-South Korea nase-Belgium.

Okwenza igama lakhe lihehe iChiefs ukuthi ubeke wamela i-Democratic Republic of Congo kowamanqamu we-Afcon ngo-1996 nango-2000.

Akahlalanga isikhathi eside kwiChiefs kodwa wayisiza kwi-Bob Save Super Bowl ngaphambi kokuthi abuyele e-Belgium kulokhu wayosayina kwi-Lokeren.

Ngokudabukisayo uMamale washona ngo-2020 kulandela ukuthatha umhlalaphansi ngo-2011 ngemuva kwelinye ithuba kwi-PSL neSilver Stars kanjalo nase-Angola kanye nase-Israel.

UKabamba Musa

IChiefs yasayinisa uMusasa esuka kwi-Saint Eloi Lupopo yase-Democratic Republic of Congo ngoNtulikazi ngo-2002. Waqhubeka nokusiza leli qembu lase-Soweto ngesikhathi liwina isicoco se-PSL ngo-2003/04.

Waphinde wajabulela impumelelo ngezindebe ezimbili ze-Coca-Cola futhi wayedlalela i-Leopards emqhudelwaneni we-Afcon ngo-2004.

UMusasa washiya iChiefs waya e-Turkey wayodlalela i-Istanbulspor ngoNhlolanja ngo-2005 ngesikhathi iChiefs isendleleni yokuphakamisa isicoco sango-2004/05.

Esithombeni esingenhla: UKabamba Musasa

Umthombo wesithombe: PSL

Izihloko zakamuva