Sizwe Sibiya
Imithetho yomvalelo esanda kuvala zonke izindlela zabaculi ukuze baziphilise, iphoqe abaculi abaningi ukuthi bafune imali ngale kwemingcele ye-Ningizimu Afrika.
Kubukeka sengathi kunesixazululo esisebenzayo kubaculi abahambele kude neNingizimu Afrika, ikakhulukazi eGoli, lapho imithetho yomvalelo yezinga lesine ye-Covid-19 iye yabulala ama-gig.
UMaster KG, yize ebandakanyeka embangweni wengoma edume umhlaba wonke iJerusalema noNomcebo, ubelokhu enza imali e-Switzerland lapho ebenandisa khona emicimbini emibili ngoMgqibelo.
Umculi wamapiano uFocalistic unandise e-Dubai ngempelasonto eyedlule ngenkathi abaculi be-pop iBlaq Diamond benandisa e-Mozambique. U-Emtee ubese-Namibia kanti uDJ Themba owayaziwa ngelika-‘Euphonik’ njengamanje wenza i-tour yasehlobo e-Europe.
Abanye abaculi, abangabanga nenhlanhla yokuthi bakwazi ukweqa imingcele, kuzofanele banandise emibukisweni yakumabonakude nesezinkundleni zokuxhumana kanye nakwimibuthano emincane yangasese kuze kube kukhululwa imigomo yomvalelo ngokwanele ukuba banandise ezindaweni ezinkulu.
NgoMandulo ngowezi-2020 ngemuva kombhikisho wabaculi we-#VulaPresident, i-Scrolla.Africa sabika ngoDJ womculo we-electro (uDJ SbiTech) owayesanda kuthuthela eThekwini kodwa amathemba akhe amakhulu okudlala ezindaweni ezigcwele eThekwini, ikakhulukazi emakilabhu asebusuku, ashaywa wumvalelo wagcina engakwazi ngisho nokukhokha irenti.