Abaculi ababhikishayo bakhempe ngaphandle kwehhovisi loMphathi

Kabelo Tlhabanelo

Kusukela ngoLwesithathu olwedlule, abaculi bendawo e-Free State bebebhikisha ngaphandle kwe-Performing Arts Centre yase-Free State, balala ngisho nasehhovisi loMphathi uMoeketsi Xaba.

Basabisa ngokwenza lokhu kuze kumiswe uXaba kuphenywe.

Laba baculi bathi bakweletwa imali yama-royalties kanye nokucula kwabo kulesi sikhungo.

UXaba ubengakaze abonwe ehhovisi lakhe selokhu kuqale lo mbhikisho evikini eledlule njengoba zonke izakhiwo namahhovisi sekuphenduke ikhaya lesikhashana labaculi abebedinwe begane unwabu abaqhamuka ezifundeni ezinhlanu.

Umxhumanisi wesifundazwe we-Cultural and Creative Industries Federation of SA, uMbuyiselo Nqodi uthe uXaba uyenqaba ukuxhumana nabo.

“Kumele athathwe ukuze aqondiswe izigwegwe noma kumele aphume ehhovisi,” kusho uNqodi etshela abakwa-Scrolla.Africa.

“Lokhu akukho mayelana nabaculi kodwa kubaphathi. Ukuqhubeka kwesikhungo kusenzeka namanje. ”

Umlingisikazi nembongi uWinnie Morabe uthe ungowase-Welkom futhi akaze azishintshe izingubo zakhe kusukela ngoLwesithathu olwedlule.

“Kodwa nginezingane ezimbili okufanele ngizondle ekhaya. Asazi ukuthi ukudla kwethu okulandelayo kuzoqhamukaphi. Sithathe isinqumo sokulala ehhovisi loMphathi kuze kuzwakale amazwi ethu,” esho.

Umlingisi uTumi Molehe wase-QwaQwa uthe lo mbiko ubhekene nezinsolo zokuthi uMphathi uyathinteka enkohlakalweni nasekukhohliseni futhi bakulungele ukuhlala baze bathole izimpendulo noma kumiswe uXaba.

Abakwa-Scrolla.Africa abakwazanga ukufinyelela kuXaba ukuze aphawule.

Usihlalo womkhandlu we-Pacofs u-Advocate Thato Moeeng uthe izindaba eziphakanyiswe yilaba baculi zamukelwe ngokufanele futhi ziyaphenywa ngumkhandlu omusha oqokwe i-Pacofs.

“Sizibophezele ngokunganqikazi ekuqinisekiseni ukuthi ubulungiswa kanye nokwenza izinto obala kuhlala enhliziyweni yayo yonke imisebenzi nokuthi ubuqotho benhlangano buyagcinwa.”